Actualités
شنوة صار : سياسة والا لعب ذري ؟
Notice: Undefined variable: post in /home/insatprecm/www/wp-content/themes/insatpress2019/amp-single.php on line 116
Notice: Trying to get property of non-object in /home/insatprecm/www/wp-content/themes/insatpress2019/amp-single.php on line 116
Notice: Undefined variable: post in /home/insatprecm/www/wp-content/themes/insatpress2019/amp-single.php on line 117
Notice: Trying to get property of non-object in /home/insatprecm/www/wp-content/themes/insatpress2019/amp-single.php on line 117
Ante-scriptum: Tous les articles paraissant dans la rubrique ‘Politique’ ne reflètent pas nécessairement l’opinion du club.
الجمعة هاذي كملو التوانسة اللي عايشين في المانيا التصويت في الانتخابات التشريعية و خرجولنا بمرشح باش يتزاد على التشكيلة العالمية الموجودة في مجلس النواب .. سي ديجا السيد هذا هو اللي مزال ناقص باش نكملو الدريم تيم في المجلس
سي ياسين العياري و للي ميعرفوش هو خلطة سحرية من نهضة و داعش و شي غيفارا ملتحي .. رش عليهم شوية ثورية و بارشا تعصب و كول بالشفاء و مضمض على التقدم و الحداثة
و بغض النظر علي السيد اللي ربح كي نجيو نشوفو نسبة المشاركة نلقاوها بلحق تضحك تقريبا وليوم باش نحاولو نشوفو علاش البايكوت هذا ؟
ديسمبر الفين وصبعطاش سبعة سنين بعد ثورة تونس ، شرارة الربيع العربي . في مثل هذا اليوم قرر سي محمد البوعزيزي انو يلنصي اكبر ثورة تحررية شهدتها البلاد
و يطيح نظام بن علي و لاحباء نظرية المؤامرة سي البوعزيزي كان مبعوث السي آي آي و تلميذ الفريدم هاوس و آدم سميث و الشيكاغو بولز و القولدن ستايت واريور و غيرهم مالمنضمات الصهيونية الماسونية العميلة و اللي ضربت بلادنا لما فيها من ثروات …تي المفيد سبعة سنين مالصراع و كولني ناكلك و خوذ في ناخذ فيك تقول عركة في حومة .. خلينا في الحاضر و اخطاونا مالوقوف على الاطلال .. بعد بمحكمونا الخوانجية و المرزوقي و التكتل و بعد ما عملو فينا ولاد المؤقتة شر البهاذل و شبع فينا الشر و الارهاب و التطرف و الميزيرية الحرفة .. شعبنا الابي و نخبته السياسية المتألقة خرجولنا بتحالف حاكم جديد ترويكا2.0 :
النداء و على راسو حافظ ولد المدير هو حزب جماعة الشعبة تخليطة رائعة من كل ماهو قديم و بايت و ارجواني و مع افخر انواع الفارينة التونسية التقليدية و هاوكا كي توحل اجبد بورقيبة و تاريخ الدساترة تو تفضها بقدرة ربي
الاتحاد الوطني الحر او حزب سي صليم ماكسيميليانو .. الحزب هذا معندوش برشا مبادئ هاوكا انا معاكم و متنساونيش و كان خطفت تصويرة تحفونة في اجتماع مالاجتماعات نحطوها فوتو دو بروفيل باش كان القضاء مفيبالوش راني في التكتل الحاكم في البلاد دونك تعملو مزية سيبولي شوية الصرف اللي عندي في تونس راني فديت مالمشيان و الجيان على سويسرا نجيب في المخبي
و اخيرا معبود الجماهير الحزب اللي ديما تيتلار و يعشق تحالفات حاكمة حزب النهضة او حزب سيدي الشيخ الحزب الاسلامي اللايت ; شوية دين شوية تاريخ اسود شوية تعصب و هاوكا سيدي عملنالكم لووك عصري و حجمنالكم اللحية و ولينا كوول و الله غفور رحيم
المشكلة في التحالف السياسي هذا انو يعتبر نفسو حاكم اما عاادي جدا تلقاهم ينبروا على الحكومة و موش عاجبهم وضع البلاد و موش مستبعد يحتجوا و يعتصموا و عادي تلقاهم يتعاركو في بعضهم و هاو استقالات هاو انسحابات كيما اصدقائنا في افاق وين الحزب حب يخرج مالحكومة و الوزراء مكبشين بايديهم و ساقيهم و قلك السهرية مزالت كي بدات حتا نزيدو نغرفوا ..حتي في القرارات المتعلقة بهيبة الدولة و مندراك تقول عندنا صبية بايرة باش نعرسولها موش دولة حتى نشاورو فولان و حتي يرضى علينا فلتان كيما اختيار تاريخ الانتخابات البلدية اللي مازلنا لليوم نستناو في شباب الحكم و على رأسهم البجبوج باش يتفاهمو على وقت يريح الجميع و في هذا الكل الشعب حالل فمو و باهت في خلق ربى ..
الوضعية السياسية الطفولية هاذي خلاتنا في حالة اقتصادية و اجتماعية متعبة اصل و الحاجة الاعظم من هذا الكل خلاتنا في حالة يأس فبعد ما تعلم التونسي يحكي و يعبر في السياسة ليوم نقص باش منقولش انعدم البث و هاذي مشكلة كبيرة فالوعي هي الحاجة الوحيدة اللي تمنعنا مالديكتاتورية و التعصب و عقلية اخطا راسي و اضرب باش توصلنا لحالة اعظم من هذي خاصة كي تزيد عليها عقلية الكسل و رزق البيليك و انا بلاصتي موش هوني و تونس متاعكم الخ الخ و كان ليوم قلة اهتمام التونسي بالسياسة خلات ياسين العياري يطلع للمجلس فانو انتخابات على الابواب و متعرش عليه شكون الكارثة اللي ينجم يطلعلك بعد هذا الكل