نحبك انت

عندي مدة ما حكيتش و ما فرغتش قلبي .. عندي مدة حاير و تاعب ، نلوج يمين و يسار ، نلوج على العبد اللي يفهمني كيفك ..
نلوج على العبد اللي يحبني و يخاف علي كيفك ، يتوحشني و ما يتعداش نهار ما يكلمنيش و ما يسمعش صوتي .
نلوج يمين و يسار …
نلوج و حد ما فهمني ، حد ما فهم انو خيالك ديما بين عينيا ، ما يفارقنيش .
يسألو و يقولو علاش هذا الكل ؟ خليهم يسألو .. خليهم خاتر ما يعرفوش انك انت الصاحبة و الاخت و الكل في الكل .
لوجت و ما لقيتش كيفك ، تي وين تحبني نلقا كيفك و انتي اللي حبيتك كي حليت عينيا في الدنيا ،و اللي حبيتك كي مشيت اول خطوة في الدنيا و كي نطقت اول كلمة و انتي اللي حبيتك كي كبرت و حطيت ساقي في الدنيا ..
حبيتك البارح و نحبك اليوم و غدوة .
وكيفاش ما نحبكش و انتي ديما واقفة معايا في الباهي و الخايب و كي نغلط تصلحلي ؟
كيفاش ما نحبكش و انتي كل شي في حياتي ؟
كيفاش ما نحبكش و انتي امي .