الدنيا أولها بسمة

كل حاجة في الدنيا مربوطة بثنائية كيف الخير و الشر، الحب و الكره، العشق و النقمة، الخوف و الشجاعة، الحزن و الفرحة، الألم و النشوة، الحنان و القسوة .. الأمور هذه الكل الإنسان في أي لحظة ينجم يختار بيناتهم .. يختار يكون خير مبعد شر .. يكون فرحان كيف ما يكون حزين .. ينجم يمشي في أي ثنية، لكن في لحظة بإيديه يغيرها إما للأفضل و إلا حتى للأسوء .. و بين كل لحظة من الأشياء هذه فما الحاجة الوحيدة الي ما فيهاش رجعة، و هي الموت و نهاية العمر الي مكتوب لكل إنسان في لحظة معرض ليها و ما يعرش كيفاش و وقتاش و علاش.

عمر الانسان واحد و مهما يصير لازم يتصرف بالباهي مهما كان السوء الي راه لازم يكون ثابت و ما ينحرفش على مبادؤه و على الثنية الصحيحة و خاصة ما يتأثرش بكلام العباد.

العمر آخره موت .. الجسد آخرته حفرة في التراب مهما طلعت في الدنيا بمالك بمركزك بقرايتك الكلنا باش نتحاسبوا على اساس افعالنا لذا كل حد يعمل الخير لنفسه و لغيره استغلوا العقل و الكلام في الصلاح خاصة الكلمة هي الي تعلي القيمة .. الكلمة الي تنصح الكلمة .. اللي تواسي الكلمة الباهية .. الكلمة اللي تضحك .. الكلمة اللي تعطي القوة..

أضحك، تحرك، أعطي لروحك قوة، أعطي فرصة لروحك، ما تضلمش روحك، ما تضلمش اللي يحبك، ما تاخوش حد بذنب حد آخر عذبك الناس مش كيف بعضها، حب و تحب، أعشق و تعشق، عيش الدنيا، أضحك، واسي، أمسح دموع غيرك، أعطيه قيمة، أنصح، قوي المورال و ما تهبطش يديك، عنق، قبل، أعطي أمل للناس، لروحك، لحبيبك، لحبيبتك، لامك، لبوك، لخواتك، لاصحابك، عيش و عيش العباد معاك، حل يديك للدنيا و ما تخليش الشر يغلب خيرك، تحدى و هز يديك الفوق قول انا قوي .. انا قوية.

الدنيا اخرتها موت و في الفترة الحساسة هذه الكل يعاون صحابوا لا تقولي لا سيكل لا اسبري لا شيء اقرا على روحك و اللي استحقك عاونوا و ماتحسدش، اقربوا ما تبعدوش، عيشوا و ما تقتلوش بعضكم، ما تقتلوش العلاقات، ما تنبروش، اعمل اللي عليك و انطلق. ما تقولش كل شيء وفا ،بالعكس ابدا من توا اقرا و اسعى ما تخليش التخمام يقتلك، اقرا و انسى كل حاجة اخرى، اعطي حق روحك حتى كان مخر، ما تخسرش الباقي حتى كان مخر خير من بلاش و خليها تكون انطلاقتك.

الدنيا اخرتها موت، ما تيأسش ما تخلي حد يحطملك طموحك بفعل و الا بكلمة و الا اي شيء، ما تخليش تجربة تقتل العواطف اللي فيك، ما تاخوش حد بذنب آخر معا العيلة، مع الاصحاب، مع شريكك، كون كيف ما يلزم حتى لو كان بقالك انسان واحد عندك فيه أمل خليك معاه و ما تتبدلش، و حتى لو كلها ما كانتش في ثيقتك ما تفقدش الأمل في الدنيا و خلي كل الثقة في نفسك، انطلق بكل اللي فيك، قدم و ما ترجعش لتالي، و مهما صار و باش يصير تتحل في وجهك مادم إيمانك بروحك قوي.

الدنيا اخرتها موت، اضحك و علي مقامك، ما تبكيش و كبش في أهدافك اللي تحب توصللهم، لكن حاول ديما بمجهودك و خلي الخلق للخالق و استغل كل لحظة تعيشها في الخير ما نجموش نرجعوا لتالي و نبدلوا، لكن بيدينا نبدلوا في مستقبلنا، عيش عيش و افرض وجودك بالخير و كي تغيب خليهم يتوحشوا طيبتك و كلامك و بسمتك،خويا و اختي الكريمة الدنيا اخرتها موت ارميوا الماضي الاليم وراكم و استمتعوا بكل ثانية، في كل نفس خارج حاول كون ايجابي مع نفسك خاصة، ما تخلي شيء في قلبك صارح العباد باللي في قلبك، ما تخليش لحظة للندم تاكلك، تكلم، عبر، انقد، اعطي و خوذ من الناس و للناس الحب و الخير و الصدق و الأمل و حتى لو تشوف انوا البيبان تسكرت قدامك قوي روحك و حلها و لو كان تعذر عليك، تأمل في الدنيا و لعل في بعدها عليك خير و منفعة أكبر، المهم ما تخليش بلاصة لليأس تدخل لقلبك و انشاء الله بالتوفيق للجميع و « لا يأس مع الحياة و لا حياة مع اليأس »