بيني وبينكم فلسة…

بيني وبينكم فلسة … ومانيش مسامح على حق الناس اللي ماتت وتقهرت وعينها دمعت من الظلم باش اليوم يجي شكون يفكلها حقها قال شنوة مصالحة وهيا نقدموا… عديتو قانونكم وعملتوا اللي حبيتو… اما الدنيا ماتمشيش بالمنطق هذا… لا يا بابا ايجا الساعة نصفيوا الحساب وبعد نبداو صفحة جديدة أما نسمعكم تقولونا أصبروا والوضع صعيب وبعد نلقاوكم تبيضوا في الفساد والسراق … مانيش مسامح

بيني وبينكم فلسة … قداشكم زعام في المبالغة والتسديد من مسافات بعيدة: يا الوضع مستقر والسماء زرقاء والعصافير تزقزق يا الوضع كارثة ومحتلين والعدو يسرق في ثرواتنا الطبيعية وغيرو من معجم الثورجية البايتة. راهو البلاد اللي عايشين فيها ماهيش تصويرة تبدللها filtre instagram متاعها على كيفك. الوضع مزري: صحيح. غلاء معيشة واحتقان اجتماعي وكذا: موجود (حتى على ماتش كورة تتسب جهات وعايلات …) التصويرة كحلة بكلها: لا فيها شوية نكت بيض يخليوك تتفاءل. الامل في غدوة خير كيما قال الحكيم كلاي: موجود أما راهو مايوليش واقع بالتبهبير والنقاشات الفارغة… ما يولي واقع كان بالخدمة يا شعب الله

بيني وبينكم فلسة… كرهتكم وكرهت غناكم واللي تسميو فيها ثقاقة (هي تجي كل شيء كان ثقافة) … كرهتكم وكرهت التلفزة اللي ما تجيب كان الهم والغم والسكر وغلظ الدم… كرهت بلاد ما تلقاش فيها كتاب باهي كاتبو ولد بلاد… بكيت الدم نهار اللي سافرت وشفت العالم كيفاش يقدر أولاد البلاد وفي بلادنا… ديما منبوذين ومنسين… شبيه قنديل باب منارة ما يضوي كان على البراني … ياخي ما عناش الحق في فن مزيان وسينما بالحق ومسرح على قواعدو …ماعناش الحق في يوما ونحبك هادي وعلى حلة عيني …كرهتكم وكرهت برامجكم اللي تخليك توصل تقول « سبحان اللي حرم عليكم القرط » على الشئ اللي نرا فيه: بطية الدلاجي، توري نوري، دالي النهدي. يا ماما يا ماما، نجلاء وعبد الرزاق …

بيني وبينكم فلسة… كرهت كورتكم واللي تسميو فيها رياضة. رياضة في بلدان العالم تقرب وتفرهد وتشيخ … كان في تونس: تجيب الهم والغم وتفكرك في وضع البلاد والعباد…. كورة مافيهاش فرجة … الطايح أكثر فيها من الواقف … ترا كل شيء فيها كان الكورة: الضرب والغورة والبونية والسب والكراسي المطيشة والدم اللي يسيل … خلي عاد الحشيش اللي يسميو فيه ستاد وهو الغنم يجري فيه أكثر من أشباه ملاعبية … أشباه ملاعبية النفس على قدو والساقين مايلعبوش في تايلندا وبعد تلقاه يخلص الملايين ويمشي في الأرض فرحا مسرورا لا ويزيد يتجبد ويحب يحترف البرة وهو مستواه يلعبو في الدوري الأنغولي كهو… ياكبدي شوف الكورة بالحق … شوف الملاعبية اللي تحب اللعبة اللي تلعب فيها … شوف Zanetti اللي قعد يلعب لل40 و Buffon اللي لليوم 40 سنة و أفضل حارس في العالم … تعلموا منهم أما ما تركزوش كان في الشعر واللبسة والوشم … تعلموا منهم الكورة الصحيحة

هالبلاد ظهرها للحيط توة… ناس حارقة وناس حارقة رواحها وناس تموت وتتنسى … ناس تخدم وناس تسب وناس قاعدة تنبر وتعطل… هالبلاد حالها مايتصلح كان ما ناقفلوها بالحق … نخدموها كل واحد من بلاصتو … نحبوها ونحبو بعضنا ونحطو يدينا في يدين بعضنا … sinon كيما تقالت مرة في مصر… « ماهي البلد دي لازم تولع على الاخر … لازم تجيبها على الأرض… » أما ديما فما أمل … ساعات يقولولي كيفاش تتفاءل وتوصل تضحك في وسط هذا الكل… ماعنديش حل آخر شخصيا … يا تضحك وتقاوم وتشق طريقك وتحارب بالضحكة في فمك … ياتسلم وتلقى روحك ميت والا في شقف حراقة … وأنا في وسط هذا الكل « وهبت عمري للأمل » كيما قال الشيخ امام  فبحيث اخترت طريق الكفاح والمقاومة والأمل… je crois dur comme fer اللي بيدينا نجمو نصلحو ونحسنو… الطريق صعيبة وطويلة أما ماهيش مستحيلة …و ما تنساوش … هالبلاد بلادنا … احنا أهلها وماليها … وهي ما ليها كان نحنا ولادها… حبوها واخدموها وأعطيوها تو تخرج خيراتها وخيرها وخميرها … على قد ما تضحيوا على خاطرها راهي بش تعطيكم … على خاطر « على هذه الأرض ما يستحق الحياة »

محمد نذير سالم