يــــاســـمينـة

حب اي نعم حب ! حب و ما تخافش ،

ما تخافش م العباد و كلامهم ، ما تخافش مل العباد و خزرتهم ليك . حب و ما يهمكش ، حب و عيش لحظة حلوة و حس لمسة حنينة تنسيك،

تنسيك في الدنيا و عبادها ، تنسيك في الدنيا و مشاكلها .

تي حل قلبك و ما تخافش ، ما تخافش م العباد و ما تخافش من روحك.

حب و ما تخممش في الي جاي،

حب كل ثانية ،دقيقة و ساعة.

تي لوقتاش بش تقعد هكا ؟ خايفة و مسكرة على روحك ؟ كلنا تجرحنا و تعذبنا ..

كلنا غلطنا و حبينا عباد ما لازمناش نحبوهم ، اما بالحب تعلمنا نختارو و بالحب تعلمنا ناقفو.

الوردة تسكر على روحها كي يضربها ريح الخريف و يجمدها برد الشتاء ، اما في الربيع تحل اوراقها و تشوف العالم ،

يزيها ما قعدت مسكرة و خايفة ، يزي ما هزها الريح يمين و يسار ، يزيها .

الوردة ليوم قوية و عينها محلولة على الدنيا ، الوردة ليوم تحب تعيش ، الوردة ليوم حبت الخريف و معادش تخاف م الشتاء .

ليوم انتي ياسمينة مزيانة ، ليوم انتي باش تحب .

حب خاتر بالحب تكبر و تقوى ، بالحب طيح و تاقف و بالحب تغلط و تتعلم