إكتبلي#2 النص الرابح: قالولي اكتب عالمقدس

جيت نسأل قالولي اكتب عالمقدس
ياخي حرت و راصاتلي في الجواب نفركس
درت عاليمين نلقا النساء تزغرت و تحرقس
و درت عاليسار نلقي الرجال تصلي و تتعبد
وقتها فهمت الي المقدس حاجة مخبية
بين السفساري و الشاشية
ولا برا نقولو في وسط شوني تتقرطس
و أحنا يا سيدي و ياللا كل واحد و المقدس متاعو
الي قدس دينو ربح الدنية و الآخرة جنتو متاعو
و الي قال تسحر أعرف راهو خانو ذراعو
فما الي حزر و كش و الشرف ما باعو
و لاخر تحل و همل و رجعو لصناعو
فما الي يشوف المقدس كي يدخل للجامع
و لاخر كي يشري صباط يشعشع لامع
فما الي تضحك و الممو دامع
و الي على الناس تقلقل و غيرها سامع
فما الي يقدس اللولية
بابا بوسعيد الباجي مكحل الغناجي
و رايس الأبحار هادي الي تلاجي
أمي عويشة المنوبية
و للات الزين الجمالية
سيدي علي عزوز أه يا الاخوان
سيدي كحل العين يا مولا زغوان
و فما زادة شكون يقدس عيسى
بوهرة الكينسية و صوت الانجيل
السيدة مريم الي لشوفتها الدمعة تسيل
وقتلي تحس روحك تاعب و العكاز بدا يميل
أرجعلها تو الهم عليك تشيل
أيا نقلكم أنا آش نقدس
أنا نقدس صوت أمي الصباح
و ريحة القهوة من يد حمة كي تفواح
نقدس الضحك في العنبة و نغير من وقت المرواح
شكون يقلي يزيك ما تعبت ايجا أقعد أرتاح
نقدس التارت الي بالغلة
و القطاطس الي تحوس في باب الفلة
الحوايح الي شريتهم من فريب الملة
و شربة الماء في الصيف مالقلة
الشمس كي تزرق و تتجلى
و السهرية بكعبة المقروض كي تتحلى
نقدس الضحكة و الخدود كي يحمارو
حكايات الليل نجومو و أخبارو
التعنيقة الدافية حانوت الأنتيكة و غبارو
نقدس الحب الي الطبة في دواه حاروا
الحشمة الي باها العينين يصغاروا
و الفرحة الي تخليهم يوساعوا و يكباروا
نقدس العباد الي في الدنيا شافوا و داروا
طاحوا و تعبوا مبعد شدو صحيح و اختاروا
كل عرق عالجبين مخبي أسرارو
و الي بالياجور و السيمان كمل بنا دارو
أوراق الشجر في الخريف كي يذبالو و يصفارو
و في الربيع كي يتفتحو و يخضارو
نقدس طرح السينيما نهارة السبت العشية
وخطوتي في المدينة بين القصبة و الصادقية
كل حجرة و كل ذكرى في زنقة و لا ثنية
و كي نتعدى نجري في سوق الشواشية
كي نشرب قازوزة من عند كمال نبرد باها السخونية
و كاس التاي عقاب العشوية
هرسة اللوز الي كلها ككاوية
البنبلوني في الصفصاف وسط الصيفية
و كلمة نحبك الي دفي أكثر مالفراشية
نقدس تونس في الليل كي تضوي بالأنبايب
و دعوة الخير من فم راجل شايب
النساء كي تلبس ذهبها و الرجال كي تتحلى بالجبايب
نقدس العروسات و لمة الحبايب
دار الحركة و الكسكسي الي في حقو طايب
و الشطحة وسط زغاريد القرايب
نقدس الناس الي تقرا و تشد كتاب
البوسة البنينة بين الشفة و الناب
و الي بعد غيبة رجع لربي و تاب
الفرج كي يجي بعد العذاب
و التبسيمة الي بيها يتحل كل باب
خلاصة القول أنا و انتي مش كيف كيف
و الي نقدسو أذاكا اختارتو
و ماهوش مفروض عليك بالسيف
أما أنا نقدسك خاطرك ماكش كيفي
خاطرك باش تقرا كلامي و تكون ضيفي
ممكن نوليو أصحاب و تعدي معايا صيفي
تسكن قلبي, مدينتي و ريفي
نحبك و نكتب اسمك في بطاقة تعريفي
.ولا تقعد ذكرى نحكي عليك في خراريفي

  Hajer Zairi بقلم