هي و هو

هي و هو ..

حكاية هي و هو بدات بكره

هي و هو ميحملوش بعضهم.. هي و هو ديما يتنابزو..
هي و هو ميعرفوش شكان يستنا فيهم..
هي ديما لاهية بقرايتها و حياتها و عمرها لا خممت بش تحب هو..
هو لاهي في روحو و بإلي يحبها و عمرو لا خمم الي هي باش تحبو..
هي و هو غابو على بعضهم عام..
هي و هو تقابلو بالصدفة في الشارع و من وقتها بدات حكايتهم..
هي و هو خرجو مع بعضهم بش يعرفو أحوال بعضهم بعد المدة هاذي الكل و من وقتها ولاو ديما يحكيو مع بعضهم كل جمعة.. بعد كل يوم.. وبعد كل لحظة..
هي بدات تتعلق بهو..
هو تعلق بهي رغم الي عندو صاحبتو..
هي قررت تحكي كل شي للهو على أمل يطلع هو يحبها زادة ..

هو  تقبل لحكاية و قرر يقعد صحاب معاها ..
أما زعما علاش؟
هي فرحت الي هوما بش يقعدو مع بعضهم..
هي و هو زادت قوات صحبتهم..
هي ديما لاهية بهو..

وهو ..
هو ولا كل شي في حياتها..
هو خذالها من وقتها..من صحتها ..
اي من صحتها ..
هو يتعارك مع صاحبتو يمشي للهي ..
هو ما تمشيش قرايتو يمشي للهي يقراو مع بعضهم .. خاطر هو يرتاح مع هي ..
هي  ما فاقتش اللي تعبت من هو..تعبت تحب في هو الي مايحبهاش و ميخمم كان في روحو ومصلحتو.. هو الاناني ..
هو الي ولا ديما يستغل فيها و يستغل في حبها و طيبتها..روحها المزيانة و ضحكتها الي مش مفارقة وجهها ..

هو الي ماهمو كان في روحو..

هو اللي ضيعلها حياتها و مستقبلها..

هو الي دمرها و حطمها..

هو الي بدل ضحكتها بدمعة و فرحتها بحسرة..

هي  فاقت ..هي قررت بش تسيب هو الي ماهوش سائل عليها و ما يهموش بالي صاير فيها..
هي تعبت و تعذبت ..
ساهل تتوحش عبد تحبو و تموت عليه؟
ساهل بش تتوحش عبد عذبها؟
ساهل بش تنسى الي عاشتو و شافتو معاه؟
ساهل بش تبدا حياتها من جديد و تعوض الي فات؟

اي ساهل..الوقت..الوقت ينسي.. الدنيا تنسي .. الخدمة تنسي.. لصحاب ينسيو..
هي عاودت حياتها .. هي نجحت ..
هي حبت مرة أخرى..اي نعم..

هي لقات الي يستاهل تكون معاه..الي رجعها للدنيا..

و هو..رجع يخمم في هي..