الحب الأول

فما شكون ماعاشوش و فما شكون عاشو، و فما شكون يتمنى يلقاه و فما شكون خايف يلقاه و يخسرو.

اكيد عرفتوني على شنوا نحكي: الحب الأول.

هو أحلى إحساس تنجم تعيشو خاتر أكثر حب طاهر، تعرفو علاش؟

خاتر باش تحس روحك طاير في السماء، شايخ، عامل كيف، تحس روحك كيما الطير إلي يرفرف في السماء و مالك الدنيا الكل. إي نعم مالك الدنيا الكل أما ماكش فاهم لا علاش و لا كيفاش و لا شنوا سبب الحالة إلي إنت فيها.

أما خسارة ليس كل ما يتمناه المرء يدركه، خسارة إلي قصة حلوة تنجم توفى ساعات حتى قبل ما تبدأ. توفى خاتر حتى واحد فيكم ما تمتع بالجرأة و صارح حبيبو بلي في قلبو، و اختار يبعد و يسكت و يدفن إلي في قلبو خاتر ماشي في بالو إلي ما فماش صدى لهذا الحب عند الطرف المقابل.

ما انجموش ننساو دور القدر في هذا، إلي حتى هو يعمل بلعاني، و يزيد يبعدكم على بعضكم و تلقاو رواحكم في ليلة و نهار كل واحد خذا منعرج جديد في حياتو.

تتعدى ليامات و السنين و تسخايل روحك نسيتو و تلقاه بصدفة في facebook و تحس بقلبك باش يخرج من صدرك كيما أول مرة ريتو، و ترجعلك شرارات الحب من أول و جديد و تحس إلي العلاقات إلي مريت بهم ماكانوش مبنيين على حب حقيقي، والي ما الحب إلا للحبيب الأول.

لكن الفرحة هذي ما تدومش برشا خاتر مكش باش تنجم تنزل على طلب الإضافة لا يقلك شكونك إنت و تاكل صدمة، و تخير تتراجع وتسكت و تخبي الحب هذا في قلبك أبد الدهر.

أذاكا علاش من المنبر هذا نقلكم متحشموش و متخافوش. و إذا كان حبيت حد، صارحو بالكشي هو زادا يشاطرك نفس المشاعر و ترتاح وقتها من العذاب و متقولش يا ريتني تكلمت.

بقلم ن.ع