انت

اي اي انت !

الي قاعد تقرا، شبيك؟ حزين؟ تاعب ولا قالق؟ تي سيب عليك، و عيش!!

شبيك باهت؟ اي عيش، أضحك مالقلب لين عينيك يدمعو، خوذ نفس و ارجع اضحك، الدنيا ساهلة اما احنا معقدينها بمشاكلنا، الدنيا محلاها اما احنا مفزدينها بخبثنا.

تي عيش و بقلة ليها، اجري وحدك، اجري و خلي يقولو مهبولة، اجري و صيح خاطر الدنيا مزيانة اما احنا شوهناها، الدنيا عشق اما عبادها كرهونا فيها.

مشاكل؟ كره و خبث؟ نفاق و خيانة؟

تي بقلة ليهم، بقلة ليهم خاطرك تحب تعيش، تحب الدنيا كيف ما هي من غير عقد و من غير تخديم مخ.

هي وردة! اي وردة حمراء، صحيح توة ذبلانة و داير بيها الشوك.

اما الوردة تقعد وردة و بشوية ماء ترجع حمراء تلمع، ريحتها تدوخك و تعذبك و تخليك تسهر الليالي تحلم باش تكون متاعك.

احلم و زيد احلم!

ايي تحلم خاطر الوردة توة قوية و محمية شادينها عروشها الي عمرهم ما يسلمو فيها وما يسيبوها. عروشها الي قواوها عليك و بعد ما انت عطشتها هوما رواوها، عروشها الي شدوها بعد ما انت سيبتها و رميتها.

عيش كيف ما تتمنى، وردة حمراء، بلاصتها فوق الراس مزيانة مش بين الشوك ذبلانة.