تتفكر؟

تتفكر كيفاش بدينا؟ كيفاش كنت نقعد وراك، نحقر الprof و نذوب في لون شعرك و ريحتو البنينة؟ كيفاش كي نراك البرا بالعاني نتعدا حذاك بش تراني؟
تتفكر كي اول مرة جات العين في العين؟
تتفكر كيفاش حكينا؟ و من اول غزرة حبينا؟
و بدات حكايتنا المزيانة
تتفكر كيفاش كل ليلة نخليكش ترقد كان على كلام حلو كيفك ، نتسبب بالقرايا و الrévision بش نجي و نحكي معاك؟

 
نتفكر؛ اي اي، نتفكر كيفاش حبيتك و كيفاش كل صباح نستنى و ما ندخل نقرى كان كي نراك و نبوسك. نتفكر اي و مش بش ننسى.

تتفكر اول ليلة؟ واخر ليلة؟ اول بوسة و اخر بوسة؟
تتفكر قداش ضحكنا؟ و قداش بكينا؟ قداش حبينا عباد و قداش كرهنا عباد؟
حبيتك ايي حبيتك خاترك كنت كل شي ليا، حبيتك خاترك مليتلي قلبي و عيني و مخي، حبيتك خاطر كنت نشوف في روحي فيك
و تخيلت عمري ليك…
حبيتك تكون ضحكتي و فرحتي، كلمتي و صوتي، روحي و قلبي. يا خسارة، حبيتك  تكون ليا انا.
نحكي كان عليك! و ما نفرح كان بيك!
عليك اي عليك! و هو مزال عندي كلام نقولو كان مش عليك؟ مزال عندي فرحة كان مش بيك؟

تي كرهت الفاك، بدروجاتها الكبيرة، بجردتها الخضراء الواسعة، بعبادها الباهين و بسطحها العالي، كرهت البراكة و كراسيها، كرهت كل تركينة تفكرني في لحظة حلوة معاك ، كرهت روحي. اي حتى من روحي كرهتها. خاطر كل بلاصة في بدني تفكرني في لمسة من لمساتك و في همسة عيشتني في لحظة مزيانة!
وين ما نمشي نراك، خيالك يتبع فيا كي الطفل الصغير كي يتبع امو، يتبع فيا و محبش يسيبني! اي محبش و ديما يفكرني بقداش كنت عزيزة عليا، و يوصل يبكيني كي يفكرني في قبل. يبكيني اي. اما مخيبو يقعد يتفرج فيا و ميتحركش، ميرضينيش، ميبوسنيش و ميشدليش يدي، يقعد واقف لين انا نموت و نحيا، مخيبو اي مخيبو خيالك، معادش يحس؟  معادش عندو قلب؟
قلو امان، نبهو و فيقو على روحو، قلو راني حبيتك، حبيت كل تركينة عشت فيها معاك و كل لحظة جمعتنا، حبيت كل تقويسة في بدنك و كل شعرة فوق راسك،
قلو راني تعبت، قلو راني نحبك !

بقلم اشرف حيوني