نحب نحكي على ضحكة مالقلب، على تبسيمة، تفرهيدة و تسليمة

انا نحب نحكي.

نحب نحكي عاللي فات و عاللي مات وعاللي دفنتوا الايامات..

نحب نحكي على لحظات عشناها و مشات و بقات ذكرى بين ايامات..

نحب نحكي على ضحكة مالقلب، على تبسيمة، تفرهيدة و تسليمة..

نحب نحكي على كلمة، على فرحة، على غزرة، على ذكرى..

نحب نحكي على احساس و على عشرة و صحبة و احسن الناس..

نحب نحكي علي هزها الزمان و هربها مالمكان..

و كتبها لقلب واحد غيري بعد ما كنا..

بعد ما كنا صحاب اما مانحكيوش كان بالتسليمة.

نحبوا بعضنا، اما نعرفوا على بعضنا كان اسامينا.

تولدنا لبعضنا و بعضنا حبينا.

وما بين اللي دايرين بينا لكل، ما حلينا كان احنا في عينين بعضنا.

هواياتنا مشتركة و اراءنا كيف بعضها ما غير حتى ما نعرفوا لا هوايات لا اراء بعضنا..

اما خسارة،

خسارة، الانسان ما يعرف قيمة اللي بين يديه كان ما يطير عليه.

و ما يحس بقيمة اللي عزيز عليه كان ما يعرف حقيقة اللي دايرين بيه.

و ما يفهم حبو للي في مخو كان ما يعدي الليالي مجروح مغصور و مقهور عاللي ما نجمش يستحفظ عليها.

و قاتلتو الغيرة عاللي هربلو بيها و طار بيها بعيد وقت اللي ماشي فيبالو بيها محفوظة في مكان امين.

هو

هو يمشي و يرجع, يهرب و يلعب, ينسى و ينسي و يغزر و يتلف و يجرح ومبعد يغير.

هو فيبالوا وقت ما يجي لبالوا باش يرجع باش يلقاها غادي وين خلاها يرجعلها و يلقاها.

اما يبطى,

يبطى على خاطر معدنها غالي و ثمين

و الذهب و الجوهر ديما في عينين الحالمين.

و قالولي،

قالولي علاش مخبي اسمك, و هاذي حاجة ما فيها حشمة.

و قالولي أخطاك، هاذي لغة مضروبة، تي ماو الناس الكل حبت و نسات و الحب ماهو كان ريق البنات.

قلتلهم مانيش كاشف على اسمي باش نخلي كل واحد يصورني بتصورية هو يتخيلها،

و بحكاية هو يتصورها.

و خليني نكون كلام الانسان اللي خلى ولا خليت عليه بلاصة ما تتعوضش.

و خليك تتخيل اللي أنا كل واحد داير بيك.

و خليك تتذكر اللي الحب ما فيهش حشمة و الحب ما ليهوش لا عمر لا جنس و لا عباد.

خليني، صوت الحب، في أبسط و في أعقد حالاته.
يتبع.